ابن امه

ابن امه كلمة على طول اول ما نسمعها نعرف ان المقصود بيها ان الام هى المتحكمة فى كل شئ وهى اللى بتقول ايه اللى يمشى وايه اللى ميمشيش
هى المسيطرة على ابنها ومخطاطاله كل حياته تقوله يصاحب مين وميصاحبش مين
ياكل ايه ومياكلش ايه
وتظهر المشكلة قوى لو الابن عجبته عروسة ولان مش امه هى اللى اختارتهاله
تبقى العروسة وحشة ومعمصة وتطلع فيها القطط الفاطسة
ويبقى الولد ادامه حل من الاتنين يا اما يصمم على موقفه ويخطبها وتبقى وقعته سودة امه هتقوله من الاول هتعصيك عليا وهتزرعله الف مشكلة ومشكلة
وهتنقلب حياته جحيم
والحل التانى ياخدها من قاصرها ويسمع كلام امه ويرضى باى واحدة تنقيهاله

ولكن السؤال هنا لو الابن مسمعش كلام امه وصمم على اختياره يبقى ابن عاق?
ولو حاول يفهمها بالذوق ان اللى بتعمله ده غلط يبقى متمرتش فيه التربية?
والام هنا فى تسلطها سلوك عادى زى اى حماة ولا سلوك مرضى ميتسكتش عليه?